Ցեղասպանութեան հարիւրամեակը: Բոլորս Ներկայ

Հազիւ մէկ ամիս պակաս է Հայկական Ցեղասպանութեան Հարիւրամեակին, որուն ոգեկոչման առթիւ տեղի ունենալիք ձեռնարկներուն առաջինը կը սկսի վաղը Հինշաբթի երեկոյեան ժամը 7ին մայրաքաղաքիս Մեթրոփոլիթանա տաճարի մէջ Սուրբ Պատարագով:

Երէկ, Հարիւրամեակի յանձնախումբը, որ կազմուած է գաղութիս մէջ գործող բոլոր կազմակերպութիւններու ներկայացուցիչներով, մամլոյ ասուլիս մը տուաւ տեղական լրատուական միջոցներուն , ներկայացնելով տեղի ունենալիք բոլոր միջոցառումները: Պէտք է յիշել որ յանձնախումբի կողքին աշխատող ենթայանձնախումբերուն մաս կը կազմեն կամաւորներ:

Նաեւ ընկերային ցանցերու դիմատետրին մէջ, որ շատ տարածուած է սփիւռքի մէջ, իր պաշտօնական էջը բացած է հարիւրամեակի յանձնախումբը, ուր օրը օրին տեղեակ կը պահէ հասարակութիւնը իր գործունէութեան մասին:
Շատ կարեւոր է մեր գաղութին մասնակցութիւնը այս ձեռնարկներուն: Մեզմէ իւրաքանչիւրը ջանայ ընկերային ցանցերու միջոցաւ տարածել լուրը կատարուելիք ձեռնարկներուն եւ քաջալերել որպէսզի որքան կարելի է մեծ թիւով ազգայիններ ներկայ գտնուին եւ յարգեն յիշատակը մեր զոհերուն: Վաճառատուներու կամ աշխատավայրերու վրայ Ապրիլ 24ի օրը զետեղել «ՓԱԿ Է» որմազդներ:

Արժանթինի մէջ, հարիւր տարուայ մեր աննահանջ պայքարով կրցած ենք կարեւոր նուաճումներ արձանագրել, զորս պէտք է ցոյց տանք:

Պէտք չէ թոյլ տալ որ այս ոգեկոչման ամենացաւալի եւ հիմնական երեսը աննշմար մնայ: Հարիւր տարի առաջ մէկուկէս միլիոն մարդիկ ջարդուեցան եւ խոշտանգուեցան վայրագօրէն, պարզապէս որովհետեւ հայ էին : Եւ մինչեւ այսօր թուրք պետութիւնը կ’ուրանայ գործուած ոճիրը, որուն զոհերը եղած են մեր մեծ հայրերն ու անոնց ծնողները:Եւ վերապրողները վկաներն են այդ անմարդկային արարքներուն:

Մեր նահատակներուն ոգեկոչումը , միայն զոհ ըլլալու հանգամանքը չէ. այլ արդարութեան եւ ճշմարտութեա պահանջքն է , որոնք անհրաժեշտ սիւներն են եւ երաշխիքը ապագայի համերաշխ համակեցութեան. եւ որպէսզի չկրկնուի այլեւս ցեղասպանութիւն ոչ մէկ տեղ:

Compartir